Gwen gihagit ni Tomas pagkanselar sa allowances sa mga huwes

CEBU, Philippines – Gihagit ni Cebu City Mayor Tomas Osmeña si Gobernadora Gwendolyn Garcia nga kanselahon ang gipanghatag nga incentive allowance sa probinsya ngadto sa mga huwes.

Ang mayor dili na mabalaka kung kini himuon sa gobernadora tungod kay giaprubahan na sa Korte Suprema ang gisugyot sa siyudad nga Judiciary Equalization Fund.

Ang pundo nga anaa niini mao unya ang ihulip sa allowance sa mga huwes nga tangtangon sa usa ka Local Government Unit (LGU).

Katuyoan sa city government sa equalization fund nga dili na mahasi ang huwes pagbasura sa kaso batok sa usa ka lokal nga kagamhanan.

Ang kagamhanan sa dakbayan mohatag og usa ka milyon ka pesos isip kontribusyon nga mahimong kapahimuslan sa mga huwes.

Gitakda ang pagpirma sa Memorandum of Agreement (MOA) tali sa City government ug sa Korte Suprema karong adlawa.

Ang administrador sa labaw’ng hukmanan nga si Jose Perez maoy mopirma sa kasabutan nga ipahigayon sa City Hall uban kang Mayor Osmeña.

Ubos sa kasabutan, ang kagamhanan sa dakbayan matag tuig nang motunol og usa ka milyon ka pesos alang sa maong pundo nga huptan sa Korte Suprema.

Nahuna-hunaan sa mga opisyal sa siyudad ang sugyot pagtukod sa equalization fund dihang pipila ka huwes ang gikatahong gitangtangan og allowance sa provincial government.

“For a judge to avail of this fund, Governor Garcia has to cancel their allowance first, that’s why it’s called equalization fund,” sumala ni Osmeña.

Gitataw sa mayor nga ang maong pundo mahimong mapahimuslan usab sa ubang mga huwes sa nasud nga dili makatarunganong gitangtangan og allowance sa LGU.

Nagtuo hinuon si Osmeña nga ang pagtangtang og binuwang allowance sa mga huwes dili himuon sa ubang LGU gawas sa probinsya sa Sugbu. (Elly Bolonos) (BANAT NEWS)