Electrician nakuryentihan patay

CEBU, Philippines - Patay ang usa ka electrician human kini nakuryentihan samtang nagtaud sa mga wire sa opisina sa LBC sa Paseo Center Banawa barangay Guadalupe ning dakbayan pasado ala-una sa hapon sa miaging adlaw.

Si Gaudioso Manilag,39, lumolupyo sa barangay Sayaw lungsod sa Barili   nakuryentehan samtang nagtaud og mga wiring.

Base sa pasiunang imbestigasyon sa kapolisan ang biktima nagtaud og wiring sa maong opisina ug sa dihang kalit lang siya’ng miingon nga “Uy! Si Gary nakuryentehan!” mao nalay nakit-an sa mga kauban   nga nahulog na kini sa aluminum nga hagdanan nga maoy iyang gigamit sa pag-abot sa mga wire nga iyang gipangtaud.

Gidali pa unta og dala ang biktima sa mga kauban ngadto sa Cebu City Medical Center aron matabang ang kinabuhi apan gideklarar kini nga dead on arrival sa mga doktor sa maong tambalanan.

Samtang sa laing bahin, napusilan ang usa ka 16-anyos nga batan-on nga lumolupyo sa Sto. Niño I Cabantan, barangay Luz pasado alas 2 kagahapon sa buntag.

Human mitambong og disko sa Purok 8 barangay Lahug ang mga grupo sa fraternity midesider nga mamauli na lang sa ilang mga panimalay apan ang wala mailhing lalaki kalit lang   mitumaw sa ilang kiliran ug mipabuto hinungdan nga mikaratel og panagan ang mga batan-on.

Apan sa ikaduhang pagpabuto sa suspetsado, napagan na ang 16 anyos nga batan-un ug nakaangkon og samad pinusilan sa walang bahin sa iyang tiil samtang ang biktima daling nakaipsot palayo sa lugar.

Daling gidala ang biktima sa Cebu City Medical Center alang sa iyang kaayuhan.

Matud pa ni Victor Ruel Ayuman human nahinabi sa Banat News base sa gisaysay sa mga batan-on nga nagduda sila nga miyembro ang suspetsado sa Cebu Royal Gangster.

Dugang pa ni Ayuman nga iyang pagduda nga posibleng gisuyaan ang mga grupo sa mga batan-on hinungdan nga gipalegrahan kini og pusil. - BANAT NEWS