5 kapitan moduso og laing 'manifesto'

CEBU, Philippines - Nagplano ang lima ka mga barangay kapitan sa dakbayan sa Sugbo pagsugyot og laing kandidato sa Bando Osmeña Pundok Kauswagan (BOPK) pagkamayor ug bise mayor sa siyudad alang sa sunod tuig nga eleksyon.

Kini human sa ilang gipapirmahan nga manifesto nga nagtuboy sa panagpares nilang Kongresista Raul del Mar ug Mayor Tomas Osmeña sa 2010 elections.

Nagtoo si Pit-os barangay captain Nilo Tariman nga dili paburan sa mayor ang maong tandem tungod usab sa giingong pagbalibad ni Kongresista del Mar.

Nasayran nga gisumitir na nilang Tariman ang nahisgutang manifesto ngadto sa mayor nga gipirmahan sa 46 ka mga barangay kapitan.

Nagdumili hinuon pagbutyag si Tariman sa gisulti ug sa reaksyon ni Osmeña human nila itunol ang kontrobersyal nga manifesto.

Apan una nang gipadayag sa mayor nga dili niya prayoridad ang paghatag og pagtagad sa gihimo sa maong mga barangay kapitan.

Gipadayag ni Tariman nga silang nagpasiugda sa manifesto magtigom pagbalik niining buwana aron hisgutan ang sunod nilang lakang.

Matud sa kapitan nga human unya nila mauyunan ang lig-on nga pares, laing manifesto na usab ang ilang papirmahan sa mga barangay kapitan ug iduso sa mayor. -  BANAT NEWS