Tanod napusilan sa polis patay

CEBU, Philippines - Patay ang usa ka giingong tanod human kini pusila sa polis nga miresponde sa alarma niadtong Sabado sa alas 7:20 sa gabii diha sa sitio Gray Rock barangay Pangdan, dakbayan sa Naga.

Ang biktima mao si Rolando Abalo, 33, residente sa sitio Og-og sa maong barangay kinsa nakaangkon og tulo ka samad pinusilan sa lawas ang daling gidala ngadto sa Minglanilla District Hospital apan tungod sa kahimtang niini gibalhin kini ngadto sa Vicente Sotto Memorial Medical Center.

Apan pagka-alas 12:00 sa tungang gabii nakabsan gyud kini sa kinabuhi.

Gipangita pa usab sa kapolisan ang usa ka lalaking ginganlan lang og “Cañalita” walay permanenteng address nga giingong kalit lang nahanaw sa crime scene atol sa hitabo.

Ang gitumbok nga nakapusil-patay nga mirespondeng mga polis mao sila si PO3 Romeo Bolaño, PO3 Cristino Canono ug PO2 James Cañete.

Si SPO3 Daniel Tarucan kinsa maoy miimbestigar sa maong hitabo mibutyag sa Banat News kagahapon nga miresponde ang maong mga polis sa alarma kabahin sa armadong tawo sa maong dapit.

Ang tulo ka polis nga nagbase sa deskripsyong gihatag kanila kabahin sa pamayhon ug gisul-ob sa armadong tawo nagtuong mao kini si Isaias Capablanca alyas “Dodo” kini kinsa dunay warrant of arrest sa kasong murder ug gikatahong kanunay'ng mag-anhaan sa sitio Gray Rock.

Apan sa ilang pag-abot sa lugar, sila si Abalo ug kaubang lalaki ang ilang nakit-an ug mitakdo sa pamayhon sa gialarmang armadong tawo hinungdan nga gigunitan dayon ni PO2 Cañete ang kauban ni Abalo samtang si Bolaño mao say migunit sa nagbagal nga hawak sa namatay dungan sa pagpailang siya polis.

Apan gikatahong giwakli ni Abalo si Bolaño dungan sa pagtubag og “ngano man diay og polis mo?” hinungdan nga gilayog ni PO3 Canono si Abalo aron madisarmahan.

Gumikan kay mas dako man ang panglawas ni Abalo wala makaporma si Canono ug ang giwakling si Bolaño.

Gikatahong mibunot dayon sa iyang pusil si Abalo ug gipusil si PO3 Canono apan daling nakadagan ug nakatago ang maong polis sa luyo sa sakyanan hinungdan nga wala kini maigo.

Kini maoy hinungdan nga gipusil ni Bolaño si Abalo apan bisan paman nga nasamdan na ug dayon nang katumba gikatahong gition pa gihapon ni Abalo ang iyang armas ngadto kang Bolaño hinungdan giusban na usab kini og pusil sa maong polis.

 Dugang pang Tarucan, bisan diha na sa yuta si Abalo wala gihapon niini dayon buhii ang iyang armas bisan gisinggitan na kini sa mga polis nga ibutang kini.

Sa ikatulong singgit ni Bolaño diha buhii ni Abalo ang gikuptang kalibre. 357 revolver nga nasutang wala diay lisensiya ug may lima ka buhing bala ug usa ka kabhang.

Daling gidala si Abalo ngadto sa VSMMC apan nakabsan kini sa kinabuhi, matud pang Tarucan nakakuha usab ang mga doktor og dugang unom ka buhing bala diha sa bulsa niini.

Ang kapolisan sa Naga misumiter og request ngadto sa crime laboratory aron mapaubos sa paraffin test ang mga kamot ni Abalo aron matino kun nakapabuto ba gyud kini og pusil.

Ang kapolisan nagsusi pa usab kung tanod ba gyud sa barangay ang biktima ug naghuwat usab sa mga paryente niini nga moanha sa ilang buhatan aron moduso og reklamo.  - Uban sa report ni Lesley Caminade (BANAT NEWS)