Toledo City Miawhag og investors

CEBU, Philippines - Dakbayan sa Toledo miagni og sa mga investors sa pagbubo og puhunan sa ilang dakbayan. Kini maoy pamahayag ni Mayor Arlene Zambo atol sa ground-breaking ceremony sa Cebu Landmasters, Incorporated (CLI) sa ilang bag-ong proyekto nga mao ang San Josemaria Village sa barangay Media Once, dakbayan sa Toledo.

Ang maong 3.6 ektaryang subdivision gi-develop gihulagway ni CLI president Jose Soberano III nga usa ka first class apan affordable ang presyo niini. 

Si Zambo sa pakighinabi niini sa mga tigbalita nagkanayon nga mapasalamaton siya sa CLI sa pagpas-an sa risgo sa pag-invest niini diha sa ilang lugar bisan sa krisis sa ekonomiya karon.   Hinuon matud sa mayor, kumparar sa uban, ang dakbayan luag pa ang mga luna ug naghuwat lang og mga development ug mga investors nga mosulod. Gihulagway usab niining kun kabahin sa kahapsay ug kalinaw ang hisgutan dili susama ka samok ug kadaghan sa krimen matag adlaw kun ikumparar sa uban.

Gipasigarbo sa mayor ang hustong suplay sa kuryente, internet connections ug landline connections sa telepono nga tukma alang sa real state development. Gilauman ni Zambo nga duna pay mga dugang nga mga investors ang mosulod sa ilang dakbayan aron mahatagan og dugang oportunidad ang mga residente sa lugar nga makatrabaho.

Ang Toledo usa ka “mining city” ug nahimo kining siyudad dihang nabuksan ang Atlas Mining apan sa pagkasirado sa maong minahan mibalik ngadto sa panguma ug pagpaninda ang mga tawo. Ang Toledo ang dunay sobra sa P300 milyones nga Internal Revenue allotment (IRA) matag tuig ug nga may populasyon nga 150 mil.  - Brenda Batuto  (BANAT NEWS)