CEBU, Philippines - Patay nang nakit-an ang usa ka 15-anyos nga dalagitang mabdos og upat ka bulan human kini gituohang naghikog sulod sa ilang payag tungod sa kahiubos sa iyang kapuyo diha sa barangay Langub lungsod sa Asturias kagahapon sa alas 7:00 sa buntag.
Ang namatay giilang si Trichel Jaime, 15, dunay kapuyong giilang si Nestor Narvasa, hingkod ang panuigon ug nagpuyo sa maong lugar.
Matud pa ni SPO1 Dennis Nocus sa Asturias Police dihang nahinabi sa Banat News sa gihimong pakisusi gikan sa mga silingan sa duha, nadunggan nila ang duha nga nag-away ug nagsiningkahay nianang alas 7 sa gabii.
Gikatahong dangtan ang pila ka gutlo nakit-an nilang mibiya si Narvasa aron adto mohigda sa panimalay sa mga ginikanan ug aron mahunong na ang ilang panag-away.
Nianang pagka-buntag usa ka 12-anyos nga batang silingan sa duha nga si Angel Cambarihan nanuktok sa pultahan sa managpuyo ug nangita kang Narvasa.
Apan walay mitubag ug walay nangabli hinungdan nga mipauli ang bata apan mibalik kini nianang pagka alas 9:00 sa buntag ug subling nanampit apan wala gihapoy mitubag hinungdan nga gipugos nila og abli ang pultahan sa maong payag.
Matud pa ni SPO1 Nocus nakugang nalang sila pagkakita sa mabdos nga nagbitay na nga may linubid nga malong sa liog ug gihikot diha sa sagunting sa atop.
Sumala pa sa kapolisan milagom na ang dalagita ug daw nagtugkad sa salog ang posisyon niini samtang nagbitay, ang municipal doctor nga si Ivar Arellano nga mihiling kaniya mideklarar nga patay na kini.
Kun basehan ang pamahayag sa mga silingan nagtuo ang kapolisan nga kahiubos sa dalagita ngadto sa kapuyong mibiya sa balay ang hinungdan sa paghikog niini. (BANAT NEWS)