CEBU, Philippines - Wala dawata ni Kongresista Antonio Cuenco ang hagit ni Justice Secretary Raul Gonzales alang sa usa ka debate labot sa Rules on Criminal Procedures.
Nasayran nga ang maong hagit maoy tubag ni Gonzales sa pagsaway ni Cuenco sa mga prosecutor sa Ilo-Ilo city labot sa pagka-dismiss sa kaso labot sa ilegal nga drugas tungod sa paghangyo sa prosecutor nga ibasura ang kaso tungod sa kakulang sa ebidensiya.
Kini bisan pa man og wala pa kapresentar ang depensa sa ilang mga ebidensiya ug testigos.
Matud pa ni Cuenco sa pagpakighinabi sa DyRF nga dili kinahanglan pa ang debate tungod kay klaro kaayo ang Rules of Criminal Procedures ang korte na unta ang may gahum sa pagpagawas sa desisyon dili kay unhan sa prosekusyon.
Si Cuenco miingon usab nga dili siya buot pa nga mauwawan ang justice secretary kay ang katawhan maoy mas labing nahibalo unsay sakto.
Gipadayag usab niini ang iyang pagduda nga may mga prosecutors ang tua nakapusta sa mga durugista nga mapasakaan og kaso. - Chester Abadilla (BANAT NEWS)