CEBU, Philippines - Walay plano si Mayor Tomas Osmeña sa paghatag og pagtagad sa reklamo sa pamilyang Burden labot sa kontrobersiya sa texters’ choice award atol sa Miss Cebu 2009.
Gusto sa pamilyang Burden nga dunay kausaban sa Cebu City Tourism Commission (CCTC) aron dili na masubli ang iregularidad nga nahitabo atol sa nahisgutang beauty pageant.
Nabulabog ang Miss Cebu 2009 sa dihang lain ang gitawag sa nahisgutang special award ug dili ang tinuod nga midaog niini nga si Kimberly Therese Burden.
Butang nga dili madawat sa pamilyang Burden ingon man sa mga higala ug tigpaluyo ni Kimberly hinungdan nga sila miprotesta.
Dunay gihimong imbestigasyon sa reklamo sa pamilyang Burden nga miresulta sa pagpangayo og pasaylo sa CCTC ug sa ubang nalambigit sa kontrobersiya.
Apan alang kang Osmeña, usa ka dakong sayop ang pagpangayo og pasaylo sa CCTC tungod kay susama ra nga giangkon niini ang kasaypanan.
“The incident is unforeseen, no one anticipated that some ass____ would change the result, they did not anticipate that somebody would do something like that,” sumala ni Osmeña.
Subay niini gipahibalo sa mayor nga dili niya tandugon ug walay mahitabong kausaban sa mga sakop sa CCTC nga maoy tigpasiugda sa Miss Cebu beauty contest.
Butang usab nga gikadismaya sa inahan ni Kimberly nga si Dr. Rowena Burden nga malaumong aksiyonan sa mayor ang iyang reklamo.
Kini tungod sa iyang gipaabot nga drastic action nga himuon ni Osmeña subay usab sa gipahibawo kaniya ni City Administrator Francisco Fernandez.
“Of course naguol ko, na-disappointed ko sa iyang reaction, wa man lang niya gud hatagi og importansya among reklamo,” sumala ni Dr. Burden.
Subay niini miingon ang doktora nga subli nilang sabutan sa ilang pamilya kun unsa ang sunod nilang lakang nga pagahimuon.
Una nang gipadayag ni Dr. Burden ang pagpasaka og kaso batok sa mga pageant organizers kun dili nila makab-ot ang ilang gipangita nga hustisya. –BANAT NEWS