CEBU, Philippines - Sobra sa usa ka gatus ka libo ka pesos ang balor sa mga bulawang alahas ug mga mahalong cellphone sa usa ka Swedish ang nahanaw human gilungkab ang pinuy-anan niini sa sitio Saksak barangay Calidngan siyudad sa Carcar sa milabay'ng adlaw.
Ang biktima mao si Tomy Michael Soon, 44, nagpuyo sa nahisgutang lugar ug naminyo og usa ka Pilipina nga si Angelie Soon.
Matud pa ni PO1 Alex Buanghog sa Carcar City Police Station nga nahinabi sa Banat News nagkanayon nga ang mga butang nga nahanaw sa ilang pinuy-anan mao ang usa ka paresan sa ariyos; gold nga bracelet;upat ka bulawang singsing ug tulo ka mga mahalong cellphone nga pulos nagkantidad og tag P15 mil matag usa ug sa kinatibuk-an gibana-banang mokantidad og P180 mil.
Ang langyaw nagkanayon sa mga polis nga wala sila makamatikod nga may tawong misulod sa ilang balay ug diha nalang nila madiskubrehi ang pagkahanaw dihang ilang gisusi ang gibutangan sa mga alahas sa drawer sa ilang lawak.
Nagduda ang maong langyaw nga kadugo ra sa iyang asawa ang mihimo niini. – BANAT NEWS