CEBU, Philippines - Naa na sa mabugnaw nga prisohan sa Talisay ang usa ka suspetsado sa pagpanunggab kinsa boluntaryong mitahan sa iyang kaugalingon ngadto sa kapolisan sa maong dakbayan niadtong Domingo.
Ang suspetsado mao si Ronald Menso, 26, nga taga sitio Libo, barangay Mohon, dakbayan sa Talisay kinsa human makadunggab kang Ramil Dalman, 35, niadtong Sabado sa gabii, misibat apan misurender usab dayon.
Si Dalman, kinsa taga Barangay San Isidro sa maong siyudad samdan sa walang abaga ug tiyan .
Base sa imbestigasyon sa kapolisan nga si Dalman mikuyog sa iyang asawa nga mibisita kang Joy Alfanta nga ilang higala didto sa Libo unya nakig-inom kini sa iyang amigo nga si Gerry.
Apan matud pa gikalalis ni Gerry si Menso unya dihang mitambag si Dalman, nasuko na hinuon si Menso kaniya hangtod nga nagkalinayogay silang duha.
Si Menso nga nagtangkil og kutsilyo dali ra kaayong nakalanit niini ug dihadiha giluba ang biktima.
Hinuon nasalbar ang naulahi kay nahatod man dayon kini ngadto sa tambalanan sa dakbayan sa Sugbo, ug si Menso nagpaabot nalang sa kiha nga isang-at batok kaniya. (Brenda D. Batuto) (BANAT NEWS)