Furniture company gi-welgahan

CEBU, Philippines - Milusad og welga ang gatusan ka mga mamumuo nga sakop sa Associated Labor Union –Trade Union Congress of the Philippines (ALU_TUCP) nga usa ka furniture export company sa dakbayan sa Mandaue.

Ang giwelgahan mao ang R &Y Augusti sa sitio Alinsug sa barangay Basak nga gidumala sa general manager nga si Jay Evangelista.

Ang presidente sa nagwelgang mamumuo nga si Cirilo Labay nagkanayon nga may abiso sa welga ang Department of Labor and Employment (DOLE) 7 ug kapolisan sa Presinto 3 sa Basak Police Station.

Aron hapsay ug malinawon ang welga mipadala og mga polis ang Presinto 3 diha gawas sa pabrika.

Si Joy Lim, tigpamaba sa ALU nga nahinabi sa Banat News miingon nga ang paglusad sa welga tungod kini sa kapakyas paghatag sa mga demanda sa tagdumala sa maong kompaniya ngadto sa mamumuo niini.

Kini mao ang mga benepisyo subay sa lagda sa pamuo dinhi sa nasud nga naglakip sa kapakyas sa paghatag sa 13th month pay, walay klarong sweldo ug wala pagbayad sa 50 ka mga mamumuong gipangtangtang.

Si Lim miingon nga nakasabot ang mga mamumuo sa nasinati nga global financial crisis hinungdan nga giagwanta nila nga tulo ra ka adlaw sa matag semana ang trabaho.

Dugang pa ni Lim nga nasagmuyo usab ang pipila ka mga kawani (kuyog sa nagwelga) tungod kay dunay gipang-promote nga trabahanteng di sakop sa union maong nagduda sila kun naglisod ba gyud ang kompanya.

Pakyas hinuon ang Banat News pagkuha sa habig sa tagdumala sanglit wala pa kini sa iyang buhatan kagahapon atol ning pagsulat sa balita.  - Romeo Limpangog (BANAT NEWS)