CEBU, Philippines - Kutob na lang karong Marso 20 ang pagpahigayon og random drugtest sa Department of Education kon DepEd uban sa Department of Health kon (DOH) ngadto sa mga tinun-an sa publiko ug pribadong mga tunghaan sa dakbayan.
Kini maoy gipahibawo ni Cebu City Schools Division education supervisor Cipriano Balili human gisugdan ang kinalit nga drugtest niadtong miaging semana.
Rason niini nga mahatagan pa og higayon ang pagpahigayon og confirmatory drugtest sa dili pa mutak-op ang kasamtangang tuig-tigtungha.
Sukad niadtong miaging semana, 13 pa lang ka mga publiko ug pribadong tunghaan sa dakbayan ang naduaw sa team alang sa random drug test.
Nagtuo hinoon si Balili nga malukop ra sa team pagpahigayon sa kinalit nga drugtest ang 123 ka mga tunghaan sa high school sa siyudad hangtud sa deadline.
Apan kadtong mga tunghaan nga dili maabtan sa gihatag nga tagal, adto na sa buwan sa Hunyo himoon ang drugtest atol sa pagbukas sa klase.
Katapusang tunghaan nga napahigayonan sa random drugtest mao ang Camp Lapu-Lapu National High School nga gitambungan sa kadagkuan sa Chairman sa Dangerous Drugs Board nga si Vicente “Tito” Sotto III.
Gibutyag ni Sotto nga wala pay tinun-an sa Sugbu nga napositibo sa ginadiling drugas sukad gisugdan ang kinalit nga drugtest. – BANAT NEWS