Sarno OK ibalhin

CEBU, Philippines - Andam mobalhin si Cebu City North District Election Officer Marchel Sarno ngadto sa laing dapit kun hulipan sa katungdanan.

Kini gipadayag ni Sarno human mopahibalo si Comelec Chairman Jose Melo nga mopatuman og halapad nga lahugay sa mga election officer.

Kini samtang nagkaduol na usab ang umaabot nga 2010 elections diin nabatasan na sa Comelec ang pagpatuman og reshuffling sa ilang mga tawo.

Apan niining higayona giklaro ni Melo nga ang iyang lakang gipasubay usab sa iyang nadawat nga taho nga misugod na paglihok ang mga operator sa eleksyon.

Nabalaka ang Comelec chairman sa gitawag og mga election operator tungod kay kini giingong duna nay network ug dili kakompiyansahan.

Gitataw hinuon ni Sarno nga nalatid sa balaod nga ang election officer relibuhan sa katungdanan ug ibalhin sa laing dapit kun kini mokapin na sa upat ka tuig sa usa ka station.

Nasayran nga si Sarno nakaserbisyo na og kapin sa lima ka tuig sa iyang katungdanan isip election officer sa Cebu City North District.

Giklaro hinuon ni Sarno nga siya magpaabot lang sa rekomendasyon ni provincial election supervisor Lionel Marco Castillano.

Midugang ang election officer nga walay problema kaniya kun asang dapita ilabay tungod kay kini giingong kabahin na sa iyang panerbisyo sa Comelec. – BANAT NEWS