Bill nga magpugong sa tuition fee increase gihangop

CEBU, Philippines - Gihangop ni Cebu City Councilor Edwin Jagmoc ang balaudnon nga nagtinguhang mopatuman og tulo ka tuig nga moratorium sa tuition fee increase.

Ang konsehal nga maoy presidente sa Parents Teachers Community Association (PTCA) Federation sa dakbayan mipadayag nga dako og matabang sa mga ginikanan ang nahisgutang balaudnon.

Kini ilabi na nga ang Pilipinas gikataho nga lakip nga nakasinati sa krisis pinansyal nga gisagubang ug giatubang usab sa ubang kanasuran.

Matud ni Jagmoc nga kung mahingpit nang balaud ang House Bill 2440, kini giingong maghatag unya og konsuwelo sa mga ginikanan nga nagpatungha sa ilang mga anak.

“Si Jagmoc gitakdang makigsabot sa chairman sa Committee on Education sa City Council, nga si Konsehal Gerardo Carillo, alang sa pagpalabang og resolusyon nga magsuporta sa balaudnon.

Nasayran nga ang Hunta Probinsyal sa Sugbu gitakda usab nga motuki karong adlawa sa resolusyon nga gipalabang nila ni bokal Victor Maambong ug Peter John Calderon.

Ang resolusyon magsuporta usab sa House Bill 2440 nga giduso ni Bayan Muna Party-list Representative Teodoro Casiño.

Napanglantawan hinoon ni Konsehal Jagmoc nga supakon sa nagkadaiyang mga tunghaan sa nasud ang nahisgutang balaudnon sa kongresista.

Apan kini dili mahitabo sa University of the Visayas (UV) nga unang mitubag sa mamahimo unyang epekto sa global financial crisis. – BANAT NEWS