CEBU, Philippines - Mopahigayon na usab og laing Nationwide Population Census ang National Statistics Office (NSO) sa sunod nga tuig.
Kini maoy gipahibawo ni Firmo Diputado, ang provincial statistics officer, bisan pa man kung bag-ohay lang napahigayon ang population census sa nasud.
Ang katapusang population census nga gipahigayon sa NSO gihimo niadtong Agosto 2007 diin dul-an na sa 90 milyones ang populasyon sa Pilipinas.
Nagkanayon si Diputado nga ang laing population census ipahaom sa World Population Count nga pagahimoon matag napulo ka tuig.
Subay niini gihangyo ni Diputado ang pipila ka mga barangay sa dakbayan sa Sugbu nga magpaabot na lang sa nahisgutang population census.
Labing minos upat ka mga barangay sa siyudad ang nangreklamo nga miubos karon ang ilang Internal Revenue Allotment (IRA) share.
Kini tungod kay giingong miubos usab ang ilang populasyon basi sa 2007 population census sa NSO nga gikahibulong sa hingtungdang mga barangay.
Partikular na niini ang barangay Labangon, Sawang Calero, Guadalupe ug Poblacion Pardo nga pulos nahamutang sa habagatang distrito sa dakbayan.
Gusto sa maong mga barangay nga ang NSO mopahigayon og recounting sa ilang populasyon aron matino ang tinuod nga gidaghanon sa ilang mga molupyo.
Gitataw hinuon ni Diputado nga nanginahanglan pa og pagtugot sa ilang uluhang buhatan ang pagpahigayon og recounting sa populasyon. - Elly Bolonos (BANAT NEWS)