CEBU, Philippines - Mipahigayon og konsultasyon ang chairman sa house committee on public information sa kongreso sa mga sakop sa media dinhi sa Sugbo may labot sa baruganan sa nag-ungot karung balaudnon sa Kongreso nga Right to Reply Bill.
Si Kongresista Benvienido Abante ug Kongresista Antonio Cuenco maoy nangulo paghatag og katin-awan ingon man tubag sa mga pangutana sa mga sakop sa media nga gipangulohan sa Presidente sa Kapisanan ng mga Broadcaster sa Pilipinas (KBP) Cebu Chapter Carlo Dugaduga.
Si Abante mipasabot nga walay angayang kahadlukan ang mga sakop sa media sa maong balaudnon tungod kay gitumong lang kini pag-disiplina batuk niadtong mga kurakot ug abusadong mga sakop sa media nga himuong personal ang mga pagpangatake sa usa ka indibidwal.
Kining maong balaudnon kun mahingpit na unyang usa ka balaod matud pang Abante mag-preserbar kini sa moralidad sa mga lehitimong sakop sa media, print ug broadcast.
Gidugang ni Abante nga kadtong si bisan kinsang opisyal nga atakehon sa broadcast o print media hatagan og kahigayunan ubos ning maong balaudnon nga makatubag sa maong isyu nga dili mag-hire og si bisan kinsang tigpamaba.
Gipasalig ni Cuenco nga walay angayang kabalak-an ning maong balaod basta tinarong lang ang trabaho sa mga mediamen ug dili bias sa ilang profession.
Gipasabot nila ni Abante ug Cuenco nga napugos sila pagduso ning maong balaudnon gumikan kay wala may balaod nga nag-regulate niadtong mga corrupt mediamen ilabi na kadtong mga blacktime programs sa radio nga personal ang pagpangatake sa mga opisyal sa gobiyerno.
Samtang gipadayag sa Presidente sa KBP Cebu Chapter Carlo Dugaduga nga dili pa sila kumbinsidong paluyohan ang maong balaudnon tungod kay gikinahanglan pa og taas nga panahon aron matun-an ang tanang probisyon niini ilabina kay ang sektor sa pagpanibya ang apektado niini.
Nunot niini, nanawagan si Dugaduga ngadto sa tanang mga sakop sa media dinhi sa Sugbo nga motabang sa himuong pagtuon ning maong nag-ungot nga balaudnon.
Pagkakarun ang maong balaodnon matud pa ni Cuenco aprubado na sa committee level alang sa proposed amendments sa mga probisyon niini ug iduso na sa committee on rules.
Samtang si Presidente Gloria Macapagal Arroyo ning bag-uhay lang mipadayag nang daan nga iyang i-veto ang bisan unsang balaudnong makababag sa kagawasan sa media sa nasud. - Darrel Carumba (BANAT NEWS)