CEBU, Philippines - Nagbuy-od patay nga may tupad nga .38 kalibreng pusil ang usa ka lalaki sud sa iyang lawak nga giabangan sa usa ka pension house sa eskina Manalili ug Legaspi ning dakbayan pasado alas otso sa miaging gabii.
Si Roy Potot, lumulopyo sa lungsod sa Consolacion base sa address nga iyang gisuwat sa log book sa maong pension house naabtan sa roomboy nga si Clyde Bondoc, 21, sa Neo Hope Pension House nga wala nay kinabuhi.
Matud pa sa roomboy nga iya untang pahinumduman si Potot nga milapas na siya sa iyang oras pag-okupar sa kwarto apan natingala nalang siya kay wala gyud kini motubag sa pagsige niya og tuktok sa maong lawak.
Hinungdan nga nangayo siya og pakitabang sa usa sa mga tawo sa maintenance department aron maablihan ang maong kwarto pinaagi sa duplicate nga yawe.
Tuod man naablihan kini apan ila nang nakit-an nga nagbuy-od sa iyang higdaanan nga nagkadugo tupad sa maong armas.
Ang management sa maong pension house mitawag sa kapolisan, sa pasiunang imbestigasyon nakuha diha sa lawak ang maong armas nga dunay tulo ka buhing bala, usa ka mikagar nga bala ug duha ka kabhang ug duha ka cellphone.
Si Potot nakaangkon og samad pinusilan sa walang bahin sa iyang tampihak nga maoy hinungdan sa hinanaling kamatayon.
Matud pa ni PO3 Rexy Tion nga nahinabi sa Banat News nga sa ilang pagduda naghikog gyud kini kun ang basehan lang ang armas nga diha tupad ni Potot, apan kini mibutyag nga duna pa sila’y lawom nga himuong imbestigasyon kabahin niini. (Lesley Caminade) (BANAT NEWS)