CEBU, Philippines - Tulo ka mga wanted sa dakbayan sa Talisay ang nangadakpan sa managlahing higayon niadtong adlaw’ng Huwebes ug kagahapon sa kapolisan.
Apan duha sa mga wanted nga managsuon mipakita pa og pagsukol sa mga polis ug mihagit kanila og gubat dungan sa pagpabuto og shotgun, giila ang duha mao sila si Randy ug Joel Parajes, pulos residente sa sitio Campensa, barangay Jaclupan, dakbayan sa Talisay.
Ang magsuong Parajes dunay kasong attempted murder nga nasang-at diha sa sala ni Judge Mario Manayon sa Municipal Trial Court in Cities sa dakbayan sa Talisay.
Si Insp. Jovito Canlapan mibutyag kagahapon sa buntag sa Banat News nga ang magsuong Parajes nabutang sa ilang listahan sa wanted persons human sila pasanginling mitigbas sa timberland diha sa sitio Campensa sa milabay’ng tuig.
Ang duha ang giingong mamutulay og mga kahoy aron himuong uling aron ibaligya isip panginabuhian.
Ang kapolisan ang nakadawat og taho nga ang managsuon nga taud-taud nang nagtago mibalik sa maong lugar hinungdan nga sila si PO3 Mikie Espina, PO2 Lino Diez, PO2 Leandro Azarcon ug PO1 Lino Inso uban sa kanhi kapitan sa barangay nga si Leovigildo Togonon ug sa mga tanod sa barangay ang miadto sa dapit aron sila panakpon.
Dala sa maong mga polis ang warrant of arrest nga giluwatan ni Manayon batok sa magsuong Parajes apan inay motahan si Randy giingong mideklarar og gubat sa mga polis ug mipabuto sa iyang shotgun, samtang si Joel ang nagtak-in og sundang.
Ang mga polis ang wala mahadlok ug gipangtiunan ang duha ug gipangposasan, nakuha kanila ang shotgun nga dunay usa ka kabhang nga sulod ug ang sundang nga dunay gitas-ong 20 ka pulgadas.
Samtang laing most wanted person sa Talisay ang nadakpan sa kapolisan sa Lazi, Siquijor niadtong Huwebes ug si Journel Bacus, taga barangay Lawaan II kinsa dunay kasong murder nga nasang-at diha sa sala ni Regional Trial Court Judge Eric Menchavez sa Branch 21.
Si Canlapan sa pakighinabi niini sa Banat News kagahapon sa buntag mibutyag nga si Bacus ikatulo sa listahan sa most wanted persons sa dakbayan.
Si Bacus ang gipasanginlang mipatay sa iyang silingan nga usa ka giingong ex-convict tungod sa personal nga bangi ug human sa maong insidente nagtago-tago na kini sulod sa tulo ka tuig.
Ang hepe sa kapolisan sa Lazi Police Station nga si Insp. Philip Silva ang nangulo sa pagsikop kang Bacus. (Brenda Batuto) (BANAT NEWS)