CEBU, Philippines - Mahimong mapasakaan og kaso kadtong mga prinsipal ug presidente sa matag publiko ug pribadong tunghaan nga mobalibad sa ipahigayong random drugtesting sa mga tinun-an niini nga gipasiugdahan sa Dangerous Drugs board (DDB), Department of Education (Dep-Ed) ug Department of Health (DOH).
Mao kini gipadayag ni Atty. Clarence Paul Oaminal ang undersecretary sa DDB dihang nahinabi sa Banat News.
Gibasehan ni Oaminal ang section 32 sa Akta Republika 9165 nga nagpahamtang og silot pagkabilanggo og upat ka bulan hangtud sa unom ka tuig sa mga prinsipal ug presidente sa tunghaan nga mobalibad sa himuong random drugtesting.
Gipadayag ni Oaminal nga sila sa DDB maoy mangunay pagpasaka og kaso batok niadtong mga tagdumala ug opisyal sa tunghaan nga makalapas sa maong probisyon sa balaod.
Hinuon wala pay bisan usang mihimo niini sukad nga gisugdan niadtong adlaw'ng Martes ang drug testing gikan sa Science High School sa Labangon ug ang Babag National High School sa siyudad sa Lapulapu ug dakbayan sa Mandaue. (BANAT NEWS)