P12 mil allowance, bonus atol sa Charter day

CEBU, Philippines - Ihatag ang tanang kakugi sa pagtrabaho ug pag-alagad ngadto sa publiko maoy unod sa mensahe ni acting Mayor Michael Rama sa siyudad sa Sugbu atol sa gipahigayong programa subay sa kasaulogan sa ika-72 nga anibersaryo sa Charter Day sa siyudad kagahapong adlawa.

Gihulagway sa acting mayor nga ang labing mahinungdanon sa pagpakabuhi dinhi sa kalibutan mao ang pag-alagad nga walay sama.

Mao usab kini ang giingong mithi nga gibaton sa amahan sa Cebu City Charter nga si Vicente Rama ug giingon sa acting mayor nga ilang gisagop sa pagpangatungdanan.

“The most important thing afterall in living is giving it all, giving it all, because according to them, life can be short, can be long,” sumala ni Rama.

Nakadawat lang hinuon og masipang pakpak ang acting mayor gikan sa mga empleyado sa City Hall sa dihang gipahibalo niini ang mga benepisyo nga madawat sa mga kawani.

Kini sama sa ilang P12 mil nga Additional Compensation Allowance ingon man ang gisaad ni Rama nga performance bonus ngadto sa mga empleyado. 

Gisugdan ang kasaulugan sa Charter Day kagahapon pinaagi sa usa ka Santos nga Misa diha sa Plaza Sugbu nga gi-officiate ni Msgr. Roberto Alesna.

Kini gitambungan sa mga opisyal ug mga kawani sa siyudad, mga barangay officials, ug pipila ka dinapit sama nilang PRO-7 Director Chief Supt. Federico Terte, Central Command Commander Major General Armando Cunanan ug Presidential Assistant for the Visayas nga si Felix Guanzon ug uban pa.

Gipasidunggan usab atol sa programa ang mga opisyal ug kawani sa City Hall nga giingong mipakita og talagsaong pagserbisyo.

Ang nakadawat sa acting mayor’s special award gipanguluhan nilang Konsehal Gerardo Carillo ug Konsehal Edgardo Labella.

Human sa gihimong programa sa Plaza Sugbu nga nag-highlight sa pass and review sa usa ka battalion sa mga traffic personnel sa Citom, gisunod usab ang floral offering sa marker ni Don Vicente Rama diha sa Cebu City Fire Department.

Ang apohan sa acting mayor nga usa ka senador sa Commonwealth government maoy mipalabang sa balaodnon nga nagmugna sa Cebu City Charter.

Gitiwas ang paghatag og pasidungog kagabii diha sa Waterfront Hotel and Casino sa barangay Lahug ngadto sa napiling outstanding individuals and institutions karong tuiga.

    “Sustaining the Cebuano Passion for Excellence” maoy tema sa pagsaulog sa siyudad sa Charter Day kagahapong adlawa.   (BANAT NEWS)