Tanod mipatay'g silingan

CEBU, Philippines - Gipangita sa kapolisan ang usa ka barangay tanod sa Calamba human makapusil-patay sa iyang higalang silingan sa milabay’ng gabii diha sa V. Rama Ave. barangay Calamba ning dakbayan.

Ang gipangita mao si Roger Alferez nga gitumbok nga mipusil-patay kang Winston Tuble, 32, nga iyang silingan nga naigo diha sa ulo ginamit ang wala matinong kalibre sa armas.

Base sa imbestigasyon sa kapolisan nagbarog daplin sa karsada ang biktima dihang giduol sa suspetsado ug gidiretso og pusil sa walang bahin sa tiyan ug ulo nga maoy hinungdan sa hinanaling kamatayon.

Gisuwayan unta kini pagdala sa mga kabanay sa biktima ngadto sa Vicente Sotto Memorial Medical Center apan gideklarar kining dead on arrival.

Nasayran sa kapolisan nga ang biktima ug ang suspetsado adunay panagbangi sa wala pa nahitabo ang pagpatay. - Lesley Caminade (BANAT NEWS)