Kerwin nitahan og armas

CEBU, Philippines — Gi-surrender si Albuera, Leyte Mayor Rolan “Kerwin” Espinosa ang iyang mga loose firearms ngadto sa kapulisan niadtong Sabado, Agosto 22, isip pagtuman sa direktiba sa mga awtoridad.

Sa iyang social media post, miingon si Espinosa nga misanong siya sa panawagan sa kapulisan nga ipang-surrender ang mga loose firearms.

Ang PNP nangusog sa kampanya batok sa loose firearms ug pagpangita sa mga illegal nga armas pinaagi sa nagkalain-laing programa niini sama sa Oplan Katok, Oplan Bakal ug uban pa nga ang katuyoan mao ang pagpangita sa mga armas nga napaso na ang mga lisensya ug mga illegal nga armas sama sa mga paltik.

Matud pang Espinosa kini iyang pagtahan sa mga armas pamaagi niya ni para mapakita ang iyang pagtuman sa balaod.

Giangkon hinuon ni Espinosa nga gipabilin niya ang iyang mga armas nga adunay mga lisensya kay matud niya gikinahanglan niya alang sa iyang personal nga proteksyon.

Miingon ang mayor nga dili niya mahimong ibaliwala ang iyang seguridad tungod kay nahibalo siya sa mga hulga batok sa iyang kinabuhi, ilabina sukad nga napili siya isip mayor sa Albuera.

Wala niya ibutyag ang gidaghanon ug klase sa mga armas nga iyang gisurender ngadto sa kapulisan.

Apan base sa mga hulagway nga nakita diha sa Facebook atol sa maong kalihokan dunay klase-klaseng armas nga nakapatong sa lamesa, apan wala hinuon klaroha kung asa didto ang iyang mga armas nga gipangtahan.

Kaniadto, nalambigit si Espinosa sa mga alegasyon may kalabotan sa illegal drug trade, nga iyang gilimod.  (BANAT NEWS)