Mga kawani sa Poblacion Pardo kutob Peb. 28

CEBU, Philippines - Kutob na lang karong Pebrero 28 ang tanang mga empleyado sa Poblacion Pardo sa siyudad sa Sugbu sa ilang pagtrabaho sa barangay.

Kini maoy gibutyag sa bag-o lang milingkod nga barangay kapitan nga si Fermin Dasmariñas agig paghawan sa hingpit na niyang paglingkod sa katungdanan.

Gitataw hinuon ni Dasmariñas nga ang taktakon nga mga kawani mahimo ra nga mo-aplay og balik ug kuhaon ang mas kwalipikado.

Gitinguha ni Dasmariñas nga ma-imbentaryo na sa Commission on Audit (COA) ang tanang butang sa barangay alang sa pormal nga pagtugyan niini sa bag-ong administrasyon.

Unang lakang nga buhaton ni Dasmariñas sa iyang paglingkod sa posisyon mao ang paglimpyo ug pagpanindot sa ilang barangay hall ug health center.

“Paninduton una ang among barangay hall lakip na ang health center kay importante man pud na sa dili pa ta maghuna-huna sa ubang mga proyekto,”sumala ni Dasmariñas.

Apan gipasalig sa bag-ong kapitan ngadto sa mga molupyo sa Poblacion Pardo nga iyang himuon ang tanan alang sa ilang kalamboan.

Sa iyang bahin, gipadayag sa gipalagpot nga barangay kapitan Danilo Lim nga siya padayon gihapong mo-report sa ilang barangay hall.

Kini tungod usab sa pagtoo ni Lim nga wala pa hingpit matangtang sa katungdanan tungod kay giingong wala pa mahuman ang ilang kaso.

“Mo-report lang gihapon ko hangtud sunod semana kay wala pa man mahuman ang duwa, dili man gyud ni maingon nga napildi na gyud ta,” sumala ni Lim.

Gitataw sa gihulipang kapitan nga dili usab siya buot nga mahunong ang operasyon sa barangay tungod sa bahad sa ilang mga kawani.

Gipadayag sa mga empleyado sa barangay nga dili na sila mutunga sa ilang tagsa-tagsa ka trabaho kung dili na usab mupakita kanila si Lim.

Giklaro hinoon ni Dasmariñas nga ang pag-report ni Lim sa barangay wala niya isipa nga problema, apan kini dili na niya tugotan nga manghilabot sa mga pirmahanan. -  BANAT NEWS