CEBU, Philippines - Masulob-on ang pagsaulog sa Valentine’s Day sa usa ka lalaki dihang ang cell phone niya nga itawag unta niya sa iyang Valentina nawagtang kay gisakiyo sa wala hiilhing mga tulisan didto sa barangay Yati, lungsod sa Consolacion, niadtong Sabado sa gabii.
Ang biktima mao si Climaco Barcenas Tayong, 26, nga taga Yati, Consolacion, nagtibi kay gawas nga nawagtang ang iyang cell phone wala pa gyud tungaha sa iyang Valentina niadtong higayona.
Si PO2 Rotchele Jugalbot sa Liloan Police Station mibutyag sa Banat News nga naglakaw paingon sa ilang balay ang biktima dihang kalit lang kining gisugat sa duha ka wala hiilhing mga lalaki ug kalit lang gitionan og armas de fuego dayong deklarar nga tulis.
Matud pa ni PO2 Jugalbot, human makuha ang P6 mil nga cell phone sa biktima yano kaayo ug mura’g walay nahitabo nga nanglakaw ang mga tulisan pahilayo sa maong dapit.
Si PO2 Jugalbot miingon nga nagtibi ang biktima nga misumbong kanila ug dihang miresponde sila pinaagi sa pagpatrolya ngadto sa lugar diin tulisa ang naulahi, wala na gyud nila hikit-i ang mga tulisan.
Ang mga silingan sa biktima nagkanayon nga puwerting dimalasa niini kay gawas nga nawagtangan og cell phone, wala pa gyud tungaha sa iyang Valentina. - Romeo T. Limpangog (BANAT NEWS)