Rekruter patabangon sa OFW nga matangtang sa trabaho

CEBU, Philippines - Gipaluyohan sa mga sakop sa hunta probinsiyal ang panawagan sa Philippine Overseas Employment Administration (POEA) ngadto sa mga lehitimong recruitment agencies nga mangita og dugang mga trabaho alang sa nangatangtang nga mga Overseas Filipino Workers (OFWs).

 Sigun sa napasar nga resulosyon ni provincial board member Victor Maambong nga makapaalarma na ang record sa POEA nga nagpakita nga mikabat na sa kapin sa 4,000 ang gidaghanon sa mga OFW nga nawad-an sa ilang trabaho tungod sa global crisis.

 Tungod niini ang kagamhanan naglisod sa paghatag og mga ayuda ngadto sa tanang mga OFW nga natangtang sa ilang tabaho.

 Si Maambong nagkanayon nga may dakong mahimo ang mga recruitment agency sa paghatag og laing trabaho ngadto sa natangtang nga OFWs pinaagi sa pagpangontrata niini ngadto sa ubang nasud nga nagkinahanglan sa ilang mga kasinatian.

 Apan mipahimangno si Maambong nga kadto lang lihetimong kompanya ang angayang ihatag ngadto sa mga OFWs aron nga molungtad og dugay ang ilang panarbaho didto sa gawas ug may tukmang mga benepisyo nga angayan kanila.

 Dugang pa ni Maambong nga ang paghatag og ayuda sa mawad-an og trabaho nga OFWs maisip nga tampo sa mga recruitment agencies sa kagamhanan gumikan niining gisagubang nga worldwide economic recession karon.  - Chester Abadilla (BANAT NEWS)