90 mil ka botante gipapas

CEBU, Philippines – Dul-an na sa 90 mil ka mga botante ang na-deactivate o gitangtang sa listahan sa voters lists sa duha ka buhatan sa Comelec sa dakbayan sa Sugbu.

Sa habagatang distrito kapin sa 50 mil ka mga pangalan ang gitangtang sa listahan sa mga botante ug kapin usab sa 38 mil sa amihanang distrito sa siyudad.

Ang gipanangtang sa voters lists sa duha ka buhatan sa Cebu City Comelec mao kadtong mga botante nga napakyas pagbotar sa nakalabay nga duha ka eleksyon.

Partikular na niini sa midterm elections niadtong Mayo tuig 2007 ingon man sa Barangay ug Sangguniang Kabataan elections niadtong Oktobre sa susamang tuig.

Ang duha ka buhatan sa Comelec sa siyudad nagpadayon pa paglimpyo sa voters lists ug gipaabot nga madugangan pa ang gidaghanon sa mga botante nga ma-deactivated.

Karon pa lang giawhag nang daan ni Cebu City North District Election Officer Marchel Sarno ang mga botante sa siyudad nga wala makabotar sa miaging duha ka eleksyon nga magpa-reactivate.

“Moadto sila sa atong opisina ug isulti ilang pangalan unya kung naa pa sila sa atong record, i-activate dayon nato, pero kung wala na, magparehistro sila og usab,” sumala ni Sarno.

Gipadayag hinuon ni Sarno nga ilang padalhan og notisya kadtong mga botante nga ila nang gitangtang sa voters lists.

Hangtud kagahapong adlawa, mokapin na sa 14 mil ang nalista nga mga bag-ong botante sa dakbayan sukad niadtong buwan sa Disyembre sa miaging tuig.

Nasayran nga ang continuing registration sa Comelec magpadayon hangtud unya sa Disyembre 15 niining tuiga.

Apan nihangyo si Sarno ilabi na ngadto sa bag-ong mga botante nga dili na magpaabot sa deadline aron kini dili magpunsisok sa ilang mga buhatan.

Lakip sa mahimo nang magparehistro mao kadtong mag-edad og 18 anyos atol sa adlaw sa eleksyon unya sa Mayo 10, 2010.

Kadtong mga botante nga magparehistro sa Comelec magdala lang og balido nga Identification (ID) sama sa student ID, company ID ug uban pa. (Elly Bolonos) (BANAT NEWS)