CEBU – Giangkon sa Cebu City Fire Department nga dako og epekto ang nag-ung-ong nga pagpatuman sa Akta Republika 9263 kon ang Bureau of Fire Protection (BFP) and Bureau of Jail Management and Penology (BJMP) Professionalization Act of 2004.
Kini tungod kay duna pay mga sakop sa kabumberuhan sa dakbayan nga wala makatuman sa minimum educational qualifications taliwa sa gihatag kanilang lugway.
Nalatid sa nahisgutang balaud nga gikinahanglang makatungtong og duha ka tuig sa kolehiyo ang mga bombero ug jailguards hangtud nga kini makagradwar.
Labaw sa tanan, gikinahanglan usab nga ang mga jailguards ug mga bombero makapasar sa 2nd level eligibility examination sa Civil Service Commission (CSC).
Matud sa administrative officer sa Cebu City Fire Department, SFO4 Alexis Narbuada, nga mokapin sa 20 sa ilang mga kauban ang maapektuhan unya kung ipatuman ang balaud.
Ang kabumberuhan sa dakbayan dunay 206 ka personnel apan nagkanayon si Narbuada nga dunay pipila niini nga igo lang nakagradwar sa high school.
Nidugang si Narbuada nga dunay uban nga mipadayon sa pagtungha ug milampos sa kolehiyo apan ang problema kay wala makapasar sa 2nd level eligibility examination.
Nagkanayon si Narbuada nga kung ipatuman na sa hingpit ang nahisgutang balaud niining tuiga dako ang mamahimong epekto niini sa ilang departamento.
Sa pikas bahin dili hinuon ingon niini ang masinati sa Cebu City Jail kung ipatuman na sa hingpit ang nahisgutang balaud.
Kini tungod kay matud ni City Jail Warden Supt. Efren Nemeño nga duha lang sa iyang 119 ka mga sakop ang walay 2nd level eligibility.
Nasayran hinuon nga ang BFP ug BJMP niapilar na usab sa kongreso nga hatagan og laing lima ka tuig nga lugway ang ilang mga sakop pagtuman sa requirements. – BANAT NEWS