Gibiyaan sa misis naghikog

CEBU – Naghikog patay ang usa ka bana sulod sa ilang panimalay human giingong gibiyaan sa iyang asawa niadtong Biyernes sa alas- 9 sa buntag sa barangay Sam-ang dakbayan sa Toledo.

Ang nagpakamatay giila sa kapulisan nga si Alberto Canoy, 38, nagpuyo sa nahisgutang lugar nga nakit-an nalang nga nagbitay sa pisi nga gihikot sa liog diha sa ilang kisame.

Base sa report nila ni SPO1 Henry Acosta sa Toledo City Police Station ang nagpakamatay’ng si Canoy naguol human biyai sa iyang asawang si Teresita human mag-away tungod sa selos.

Giingong nakulatahan niini si Teresita kinsa nakaangkon og mga bun-og sa iyang lawas ingon man sa nawong og gituohang maoy hinungdan nga gibiyaan siya niini dala ang ilang 2-anyos nga anak ug nidangop sa ilang mga kaliwat dili layo sa ilang panimalay.

Apan nianang Biyernes sa buntag usa ka Hazel Secares kaliwat sa iyang asawa maoy nakakita kang Canoy nga nagbitay na dihang mokuha unta kini og lawog sa ilang hayupan. (Guam Logroño) (BANAT NEWS)