Lineman nakuryentehan patay

Cebu - Namatay ang usa ka lineman sa Globe Telecom human kini makuryentihe sa linya sa sa CEBECO samtang nag-ayo sa mga kable sa Globe didto sa barangay Tapilon lungsod sa Daanbantayan niadtong Miyerkules sa hapon.

Ang nakabsan sa kinabuhi mao si Dennis Quines, hingkod, ulitawo, nga taga Minglanilla, nga usa ka lineman sa Globe Telecom.

Matud ni PO2 Columbus Noynay sa Daanbantayan Police Station nga nahinabi sa Banat News nga si Quines nakit-an nga nagtungtong sa stainless nga hagdanan sa Globe sa ibabaw sa poste nga nag-ayo sa linya sa Globe nga gikotay sa maong poste sa kuryente.

Apan samtang nagtungtong kini sa hagdanan, kalit nga nawad-an sa panimbang ug nadakin-as sa hagdan ug paingon na untang matagak hinungdan nga nanggunit kini sa buhing kuryente sa CEBECO ug dihang nakuryentehan kini natagak sa yuta.

Maayong pagkasunog ang kalawasan sa biktima ug gidali unta kini pagdala sa Daanbantayan District Hospital apan gideklarar kining dead on arrival (DOA) sa mga doktor.  - Darrel A. Carumba (BANAT NEWS)