3 bata patay sa dengue - CESSU

Cebu - Tulo ka mga bata ang namatay sa dakbayan sa Sugbu niadtong miaging buwan human matakboyi sa sakit nga dengue sumala pa sa report sa City Epidemiology Surveillance and Statistics Unit (CESSU) diha sa City Health Department.

Unang namatay mao ang 5-anyos nga batang babaye diha sa barangay Labangon niadtong miaging Enero 19.

Duha ka adlaw ang nakalabay kini gitubag usab sa kamatayon sa 4-anyos nga batang babaye gihapon diha sa barangay Binaliw.

Niadtong Enero 24 usa na usab ka 8-anyos nga batang lalaki wala na matabang sa mga mananambal ug namatay sa nahisgutang sakit.

Ang dengue coordinator ug assistant chief sa CESSU nga si Dorenda Macasucol niangkon nga taas gihapon ang casualty rate sa miaging buwan.

Kini bisan pa man sa kamatuuran nga nikunhod ang mga kaso sa dengue sa dakbayan itandi sa susamang period sa miaging tuig.

Ang siyudad duna lay 36 ka dengue cases ug tulo ang patay sa miaging buwan, mas ubos itandi sa 136 ka kaso ug walo nga patay sa Enero niadtong miaging tuig.

Taliwa niini miingon si Macasucol nga nagpadayon gihapon ang ilang hugot nga kampanya batok sa nahisgutang makamatay nga sakit.

Kini sama sa regular nga pagpahigayon og mist spraying diha sa kabarangayan ilabi na niadtong dunay mga kaso sa dengue.

Sa makausa pa subling nipahimangno si Macasucol ngadto sa mga Sugbuanon nga batasanon kanunay ang pagpanglimpyo sa panimalay ug palibot.

Partikular na niini ang pagyabo sa napundong tubig nga posibleng kaitlugan sa mga lamok nga nagdala sa makamatay nga dengue virus. -  BANAT NEWS