Inmates sa City Jail magpakasal

Cebu - Gitakda nang ipahigayon karong umaabot adlaw nga Domingo ang labing una nga Mass Wedding sa mga binilanggo diha sa Cebu City Jail.

Kini maoy gibutyag ni City Jail Warden Supt. Efren Nemenio human usab makompleto ang mga dokumento sa magminyo nga mga piniriso.

Moabot sa 15 ka parisan sa managhigugmaay ang nakakumpleto sa ilang mga papeles ug maoy gitakdang kaslon karong Domingo.

Nasayran gikan kang Nemenio nga ang City Jail duna karoy 1,980 ka mga inmates apan 15 lang niini ang nakakumpleto sa gikinahanglang mga dokumento.

Ang pangkaslon ludhan nilang acting mayor Michael Rama, Konsehal Augustus Pe Jr., ABC president Eugenio Faelnar ug uban pa.

Matud ni Nemenio nga ang Mass Wedding maoy kabahin sa ilang programa alang sa paghiusa sa mga binilanggo ug sa gawasnon niining mga hinigugma.

“Para ma-legally married na gyud ning ubang couple diri nga gustong makasal og pari, so, atong gihatagan og opportunity nga sila makasal,” sumala ni Nemenio.

Gipahibawo ni Nemenio nga si Bishop Leopoldo Tumulak didto sa Camp Crame maoy mo-officiate sa nahisgutang kasal.

Human unya niini dunay salo-salo diha gihapon sa nahisgutang bilanggoan ug gastuhan kini sa kooperatiba sa mga bilanggo. - Elly Bolonos (BANAT NEWS)