Cebu - Walo ka tawo ang naangol dihang nagkabangga ang usa ka motorsiklo ug traysikol didto sa Sitio Candabong, barangay Binlod lungsod sa Argao niadtong Martes sa alas 6:10 sa gabii.
Ang mga na-angol mao ang drayber sa motorsiklo nga si Harold Escalante, hingkod, nga taga barangay Bulasa ug ang tulo ka mga angkas niini nga sila si Joylen Laparota, 23 , dalaga, taga Bulasa, Fretzie Sarmiento, 18 , dalaga, taga Bulasa, ug Jade Adam Flores, dalaga, 21, nga taga Binlod.
Samtang ang drayber sa traysikol mao si Edgardo Relacion, 45 , taga barangay Lamacan ,ug ang mga pasahero niini nga sila si John Ryan Sarelliana, 19, dalaga, taga barangay Catang, Johnrel Capadngan, 16 , taga Gutlang, Argao ug Lizel Capadngan, 16, nga taga Gutlang usab.
Si PO1 Benjamen Gerozaga sa Argao Police mibutyag sa Banat News nga ang motorsiklo gikan sa Poblacion nga nagpaingon sa barangay Bulasa, samtang ang traysikol nga puno sa pasahero gikan sa barangay Taloot, paingon sa Poblacion dihang pag-abot nila sa sitio Candabong nahitabo ang binanggaay.
Ang mga nakasaksi nagkanayon nga sa wala pa magkabangga ang duha ka sakyanan, nag-ikis ikis ang dagan sa motorsiklo nga maoy hinungdang nga midusmog kini sa traysikol nga gikasugat sa maong lugar.
Gipanghatod ang mga angol sa tambalanan sa dakbayan sa Sugbo tungod kay may pipila kanila nga diha sa grabeng kahimtang. - BANAT NEWS