GMA imbitado sa turn-over sa mga kahimanan sa Interpol ngadto sa RP

CEBU - Plantsado na ang ipahigayong turnover sa mga kahimanan nga gigamit sa International Police (Interpol) diha sa Cebu International Port (CIP) pag-ila sa mga patay’ng lawas nga mga biktima sa nalunod nga M/V Princess of the Stars.

Kini subay usab sa pagbiya na sa mga sakop sa Interpol dinhi sa Sugbu nga nitabang pag-ila sa mga biktima sa nahisgutang trahedya.

Matud sa tigpamaba sa Interpol nga si Rosemarie Holganza-Borromeo nga nahan-ay na ang turnover ceremony karong umaabot nga Huwebes.

Lakip sa itugyan sa Interpol mao ang mobile morgue, computers, ug ubang mga dokumento pag-ila sa mga biktima sa nalunod nga barko.

“I-turn over na sa Interpol ngadto sa Philippine government aron makagamit ang nasud ani for future operations related to disaster victims,” sumala ni Borromeo.

Personal nga mutugyan sa nahisgutang mga butang ngadto sa kagamhanan sa nasud mao ang secretary general sa Interpol nga si Ronald Noble.

Gipaabot usab nga motambong sa maong okasyon ang director general sa International Commission on Missing Persons nga si Kathryne Bomberger.

Sa pikas bahin, giimbitar usab sa nahisgutang turnover ceremony si Presidente Gloria Macapagal Arroyo apan wala pa makadawat si Borromeo og kompirmasyon niini.

Lakip usab sa gidapit sa maong kalihukan ang nagkadaiyang ahensya sa gobyerno nga may kalambigitan sa disaster victim identification.

Ang turn-over ceremony ipahigayon diha sa Cebu City Legislative Building social hall sa alas 10:00 sa buntag nga sugdan pinaagi sa usa ka Santos nga Misa.

Giklaro hinuon sa labaw sa NBI-DVI, Renato Bautista, nga magpadayon ang ilang pag-ila sa mga biktima sa nalunod nga barko bisan kung mamauli na ang mga sakop sa Interpol.   (Elly Bolonos)   (BANAT NEWS)