Airman patay sa training

Cebu - Patay ang usa ka sakop sa Philippine Air Force human sa aksidente atol sa ilang training kagahapon sa hapon diha sa usa sa mga coastal barangay sa lungsod sa Sibonga.

Ang maong sundalo kansang pangalan gipugngan sa Banat News hangtud nga di pa mapahibawo ang pamilya gikatahong kabahin sa 5-man team nga nipahigayon og aircraft egress training.

Sumala pa ni Lt. Col. Bruce Concepcion tigpamaba sa 2nd Air Division sa Benito Ebuen Airbase sa pakighinabi sa Banat News kabahin ang maong training sa water survival sa ilang mga tropa.

Gikatahong pagsakdap sa maong chopper kinahanglang mangambak ang mga sakay niini diha sa dagat ug manglangoy padulong sa baybayon apan nahibulong nalang sila nga nawagtang na ang biktima.

Dangtan pila ka minutos nga pagpangita napalgan ang lawas niini ug gidali pagdala sa usa sa mga tambalanan sa Sibonga apan gideklarar kining dead on arrival.

Ang patayng lawas sa maong sundalo kasamtangang gibutang sa Rolling Hills Funeral Homes alang sa autopsy.

Matud pang Concepcion dunay lawom nga imbestigasyon nga buhaton sa maong aksidente. - Edwin Ian Melecio (BANAT NEWS)