Cebu - Ang kasong murder ipasaka batok sa suspetsadong gitumbok nga mastermind sa kamatayon sa call center supervisor nga gidakop sa kapolisan sa sulod sa Mandaue City District Hospital niadtong miaging hapon.
Ang mag-atubang og kasong murder mao si Jonelle Enfectana, 28, kauban sa trabaho sa gipatay nga si Lyn-Vi Ebarita sa Tele-Tech Customer Care Center sa maong dakbayan.
Si Inspector George Aniñon, hepe sa homicide section sa Mandaue City Police Office (MCP0) miingon nga kauban ni Enfectana nga mag-atubang og kasong murder mao ang tulo ka mga lalaki ug usa ka babayeng gipugngan pa ang mga pangalan kinsa gituohan sa kapolisan nga mga hired killers gikan sa Eastern Samar.
Matud pa ni Aniñon nga ang maong babayeng kauban pa sa tulo ka mga lalaki nga gawasnon pa niining panahona mao ang gihulagway sa mga kawani sa maong hotel nga nagdala sa pangalan nga Tina Panganiban sa pag-check-in niadtong Enero 18 sa gabii sa wala pa madiskubrihe ang patay'ng lawas niini.
Ang kapolisan nangangkong dyutay nalang masulbad na ang maong kaso human sa pagkasikop ni Enfectana ug ang pagsang-at na og kaso. – BANAT NEWS