Paghimong 5-years course sa nursing education gisupak

Cebu - Nakasugat og hugot nga pagsupak ilabi na sa mga militanting pundok ang desisyon sa Commission on Higher Education nga nagdugang og usa ka tuig aron paghimo nang lima ka tuig sa mga kursong nursing ug education sugod sa pagbukas sa school year karong tuiga.

Ang chairman sa Bayan Muna Central Visayas Paul Rodriguez mipadayag sa dihang nahinabi sa Banat News nga makapasamot lang sa kalisud sa mga ginikanan pagpatungha sa kolehiyo sa ilang mga anak ang maong nakab-ot nga lakang.

Matud ni Rodriguez nga dili sulbad pagpalig-on sa kalidad sa edukasyon ang planong pagdugang og tagsa ka tuig sa tag-upat ka tuig sa mga kursong nursing ug education gumikan kay ang gikinahanglan nga angay tutokan mao gyud ang kakulang karun sa mga husto ug modernong kagamitan diha sa mga tunghaan nga mapahimuslan sa mga tinun-an ingon man ang saktong suholan sa mga magtutudlo aron mogamot ug magpabilin kini pagserbisyo sa matag tunghaan.

“Naglisod man gani og patiwas og tungha ang mga ginikanan karun nga upat ka tuig pa samot ug himuon nang five years,” dugang asoy ni Rodriguez.

Samtang ang direktor sa Department of Education (Dep-Ed-7) Recarido Borgonia mi-insister nga dako og matampo pagpalambo sa edukasyon sa nasud ang maong lakang sa CHED aron maka-compete na kini sa edukasyon sa ubang kanasuran.

Gisalikway hinoon sa director ang mga kabalaka nga mosamot og kadaghan ang dili makatiwas sa pagtungha unya sa kolehiyo ning maong mga kurso tungod sa paghimong lima ka tuig niini.

Giklaro sa direktor nga kadto lang mo-1st year sa kolehiyo sa pagbukas sa klase karong Hunyo ang apektado ning pagpatuman sa dugang usa ka tuig sa nahisgutang mga kurso. - Darrel A. Carumba ( BANAT NEWS)