Inahan sa call center supervisor miabot

CEBU - Hustisya maoy gipangayo sa inahan sa call center supervisor kinsa napalgang patay sulod sa Nikki Garden Hotel sa milabay’ng semana ug kasulbaran sa kaso sulod sa 30 ka adlaw hangtod sa pagbalik niini ngadto sa Estados Unidos.

Si Avelina Ebarreta, inahan sa biktimang si Lyn-vi Ebarreta nga miabot kagahapon sa buntag gikan sa Estados Unidos nanawagan sa kapolisan nga sulbaron kini samtang gitugutan pa siya sa iyang trabahoan nga makabakasyon dinhi sulod sa 30 ka adlaw.

Si Avelina usa ka parking attendant sa Silver Spring, Maryland, USA ug diha sa iyang trabahoan siya nakadungog og balitang usa ka Lyn-vi Ebarreta ang napalgang patay sulod sa usa ka hotel sa dakbayan sa Mandaue dinhi sa Pilipinas.

Apan sa una gibaliwala lamang niya kini sa pagtuong susama lang og pangalan sa iyang anak apan nakugang nalang siya pipila ka oras mitawag na kaniya ang iyang mga paryente ug mga anak gumikan sa nahitabo sa iyang anak nga si Lyn-vi.

Matud pa niya nga natumba ug gitabang siya sa iyang mga kaubanan sa trabahoan pagkadungog sa balitang gipatay ang iyang anak hinungdan nga dali siyang nananghid sa trabahoan aron makapauli dinhi.

Sa iyang pag-abot kagahapon sa buntag mideretso kini ngadto sa buhatan sa Intelligence Detection and Management Branch kon IDMB sa Mandaue City Police Office ug mihangyo ngadto sa kapolisan sa pagsulbad sa maong kaso sud sa 30 ka adlaw aron sa iyang pagbalik igo na lamang siya makisayod sa mga kalambuan niini didto sa Estados Unidos.

Anggulo sa love triangle ang posibleng motibo niini, di hinuon makatuo si Ualat nga duha ra ka tawo ang mihimo sa maong krimen kundi tulo ka tawo pataas ang mipatay ni Lyn-vi human kini mahiagum sa 22 ka mga samad dinunggaban base sa autopsy report sa PNP Crime Laboratory. (Bong Soriano)   (BANAT NEWS)