Habal-habal tawgong 'Single taxi'

Cebu - Tawgon na unya ang mga habal-habal sa dakbayan sa Sugbu nga “Single Taxi” sa higayon nga mahingpit ang ordinansang iduso unya nga gipanday sa City Traffic Operations and Management (Citom).

Matud ni Konsehal Sylvan Jakosalem nga desidido na ang Citom nga ma-regulate ang tanang habal-habal sa siyudad tungod sa nagkadaghan na nga mga motorsiklo nga gihimong pasaheroan.

Ang konsehal mibutyag nga ang pag-regulate sa mga habal-habal kini labot sa mga insidenteng nalambigit niini.

Nagkanayon ang konsehal nga pinaagi niini masayon na lang unya ilhon ang mga drayber sa habal-habal ingon man ang motorsiklo nga gigamit niini.

Duna hinuoy nakitang babag si Jakosalem sa ipalabang nga ordinansahon tungod kay usa na lang unya ka pasahero ang itugot nga pasakyon sa habal-habal.

Gipaabot nga ang nahisgutang lakang makasugat og mga pagsupak gikan sa mga drayber ug operators sa mga habal-habal.

Apan gipasalig hinuon ni Jakosalem nga ilang pangitaan og mga paagi nga makab-ot ang tolerable limit paghatag og konswelo sa mga driver ug operator niini.

Kini moagi pa hinuon sa pagtuon sa Committee on Laws sa konseho lakip na ang pagpahigayon og public hearing pagsuta sa opinyon sa mga stakeholders. - BANAT NEWS