CEBU - Gikataw-an lamang sa Kapitolyo ang mando ni mayor-on leave Tomas Osmeña ngadto kang acting Mayor Michael Rama nga ipauli ang P2 milyones nga donasyon sa Kapitolyo sa Sinulog Foundation.
Matud pang Atty. Rory Sepulveda, Capitol consultant on information and revenues dili ang mayor sa siyudad maoy gitagaan sa maong kantidad kun dili Sinulog Foundation.
Si Sepulveda nagkanayon nga ang naandang tunga sa milyon ka pesos nga donasyon sa Kapitolyo sa Sinulog Foundation gihimong P2 milyones karon lang tuiga human masayri gikan kang Rama ni Gobernador Gwendolyn Garcia nga nigamay ang donasyon gikan sa commercial sponsors tungod sa ekonomikanhong krisis.
Gikalipay usab ni Sepulveda nga may surplus nga income ang siyudad sa Sugbu sa tuig 2008 aron may magamit na ang konseho sa pagpaayo sa lubakon nga dalan ug dili lamang daginoton ang wala magastong calamity fund.
Giangkon hinuon niining mahimong maka-ban si Osmeña kang Garcia sa pagsayaw sa Sinulog Mardi Gras apan ang problema mao ang pagpatuman niini tungod kay walay legal nga basehanan.
Kusganong gipanghimakak niini nga may kalambigitan ang gobernador sa pagsulay og sulod ni Jonah John Rodriguez, kanhi tawo ni kanhi mayor Alvin Garcia tungod kay napulo lamang ka tickets ang gihatag sa goberndora ug didto kini gihatag sa mga guests sa probinsya ug dili mga opisyales sa Kapitolyo.
Dugang pa sa abogado nga ang mga pasangil ug dili maayong pamahayag sa mayor bunga lamang sa kainit sa iyang ulo nga posibleng epekto sa chemotherapy sa iyang sakit nga cancer. (BANAT NEWS)