Cebu - Gipasakaan na og kaso sa National Bureau of Investigation (NBI) ang usa ka fixer nga ilang nasikop sa entrapment operation diha na mismo sa tugkaran sa NBI sa miaging adlaw.
Kasong kalapasan sa Anti-Red Tape Act of 2007 maoy gipasakang kaso batok kang Angelito Tamilon, hingkod, nga taga siyudad sa Sugbu ngadto na sa Cebu City Prosecutor’s Office.
Nalakip usab sa napasakaan og susamang kaso mao ang kaubanan ni Tamilon nga sila si Rico Transporte ug Jonard Comilang kinsa nakadagan palayo kang Tamilon dihang gisikop na kini sa mga NBI agents.
Nasayran nga daghan nang nadawat nga reklamo ang buhatan sa NBI labot niining mga fixer nga mangayo og kwarta gikan sa aplikante aron mopahikay sa ilang NBI clearance.
Sigun sa reklamo nga matud pa tag P400 ang pangayoon sa maong mga fixer gikan sa matag aplikante bisan kun P115 ra ang tinuod nga bayranan niini.
Si Cebu City Prosecutor Nicolas Sellon milig-on dayon sa resulosyon alang sa kasong isang-at ngadto sa korte human ipaubos sa inquest proceeding ang dinakpan nga si Tamilon. – BANAT NEWS