CEBU - Giawhag ni Konsehal Alan Bucao kagahapon ang iyang mga kauban sa konseho nga magkahiusa aron mahimong mauswagon ang dakbayan sa Talisay karong tuiga.
Sa iyang privilege speech sa unang sesyon ning tuiga kagahapon sa buntag, gituki ni Bucao ang mga dagkong isyu sa dakbayan sa miaging tuig.
Ang maong isyu naglangkob sa pagka newsmaker of the year sa usa ka prominenteng tawo sa siyudad ug bisan og wala ibutyag ni Bucao ang ngalan sa maong tawo, ang mga Talisaynon nasayod na nga mao kini si Joavan Fernandez kinsa nagtingkagol na karon sa Talisay City Jail.
Nahisgutan usab ni Bucao ang isyu bahin sa nahitabong over-pricing diha sa city hall, isyu bahin sa dengue ug malnutrition.
Si Bucao nga maoy acting vice mayor karon milaom nga niining tuiga magkahiusa ug magtinabangay ang mga opisyal sa Talisay aron mouswag pag-ayo ang siyudad kay nabiyaan na kini karon sa mga dakbayan sa Naga ug Carcar nga bag-o lang nahimong siyudad.
Gipanghinaot ni Bucao nga mawagtang na unta ang mga personal interes sa mga opisyal ug biyaan niini ang mga sayop nga nahimo sa milabay’ng tuig alang sa kauswagan sa mga Talisaynon.
Sa kataposan sa iyang privilege speech gisubay ni Bucao ang victory speech ni Presidente Barrack Obama sa Amerika nga nagkanayon “so let us summon a new spirit of patriotism, of responsibility, where each of us revolves to pitch in and work harder and look after not only ourselves but each other…And when we are met with cynicism and doubts and those who tell us that we cannot, we will respond with that timeless creed that sums up the spirit of a people “yes we can”. (BANAT NEWS)