Suspek sa Cañete-slay nadakpan

CEBU - Usa sa duha ka mga suspek sa pagbanhig patay kang PO3 Jose Clint Cañete sa Mactan Bridge niadtong bulan sa Oktobre gikatahong nadakpan na sa mga sakop sa Mandaue City Police Office ug Regional Anti-Illegal Drugs Special Operations Task Force.

Si Police Regional Office-7 director, Chief Supt. Ronald Roderos sa interbyu sa TV Patrol Central Visayas kagahapon miangkong nadakpan na ang driver sa motorsiklong gitumbok nga mibanhig kang Cañete.

Giila ni Roderos ang nadakpan mao si Arnel Montero, apan ang giingong gunman kansang pangalan wala ilha sa heneral nakaipsot atol sa pagronda sa mga polis sa barangay Poblacion sa lungsod sa Liloan niadto pang adlaw'ng Biyernes.

Gikatahong si Montero usa ka drug personality ug naa na sa watchlist sa kapolisan samtang ang gitumbok nga gunman gikatahong suod niining higala.

Si Montero gikatahong miangkon na sa partisipasyon niini sa krimen atubangan sa usa ka abogado pinaagi sa extrajudicial confession.

Gikatakdang ipresentar ang maong suspek sa PRO-7 karong adlawa.

Si Cañete nagsakay sa iyang motorsiklo niadtong Oktobre 21 gikan mitambong sa usa ka drug case hearing sa Lapulapu City Palace of Justice dihang gisundan sa duha ka mga tawong nagmotorsiklo ug gipusil ang maong polis.

Ang maong polis sakop sa RAIDSOTF-7 ug usa sa gihulagway nga kugihang polis sa pagpahigayon og anti-illegal drugs operations sa rehiyon ug gituuhang ang iyang trabaho maoy nakaingon sa pagpapatay kaniya.

Sa nahaunang mga report gikatahong may impormasyong nadawat ang kapolisan nga may patong na sa grupo sa mga drug pushers ang ulo sa maong polis. (BANAT NEWS)