Gipusposa'g dos por dos patay

Cebu - Usa ka construction worker gipusposan og dos por dos patay sa kauban niya sa trabaho didto sa Golden Meadow subdivision, sa barangay Gabi, lungsod sa Cordova sa miaging gabii.

Ang biktima giila nga si Joji Paloma, hingkod, nga taga barangay Labangon, Cebu City, samtang ang suspek nailhan usab nga si Isagani Caballes, hingkod nga taga Gabi.

Sa gipahigayong imbestigasyon sa kapolisan nasayran nga ang biktima mikuyog sa suspek aron pagbisita sa ilang kaubang trabahante nga si Gerald Vincent Sitoy didto sa Sitio Camolinas, Poblacion, Cordova sa alas 10:00 ang takna sa gabii.

Didto sa balay ni Sitoy nanag-inom ang grupo uban sa biktima ug suspek hangtod nga namauli ang duha nga pulos na nakainom.

Didto sa construction site sa Golden Meadow, nahinanok pag-ayo ang biktima dihang gipusposan og kahoy nga dos por dos sa suspek nga maoy hinungdan sa hinanaling kamatayon sa naulahi.

Ang mga polis nga miresponde sa hitabo nakasaksi nga nagbuy-od na nga walay kinabuhi ang biktima ug ang kahoy nga gigamit sa pagbunal sa iyang bagolbagol ug ang cellphone sa suspek diha ra sa iyang kiliran.

Ang suspetsado nga misibat human sa hitabo padayon pang gipangita sa kapolisan aron masuta unsay hinungdan nganong gipatay niya ang biktima. – BANAT NEWS