Cebu - Midangop sayo kagahapon sa buntag sa kapulisan sa dakbayan sa Sugbu si Helen Ramin tag-iya sa “Helen’s Lechon” human gipaskinan og hulga ang ilang panimalay kagahapon sa kaadlawon.
Si Sr. Insp. Mario Monilar hepe sa Homicide Section sa Cebu City Police Office nibutyag sa mga tigbalita nga si Helen nipa-blotter diha sa ilang buhatan human usab kagahapon sa alas 2 sa kaadlawon gisab-itan og paskin ang panimalay diha sa Zodiac Ville, sa Englis barangay Guadalupe ning dakbayan.
Matud pa ni Monilar nga duha ka wala mailhing suspetsado ang nakit-an sa ilang silingan nga nagsakay og motorsiklo ug nanaog ang angkas niini ug misab-it sa gate og folder sa usa ka punerarya nga adunay sulat nga “Baslanay lang ta!!!.”
Samtang si Sr. Supt. Patrocinio Comendador, hepe sa Cebu City Police Office miingon nga ang duha ka pamilya mipadangat na og feelers alang sa usa ka dayalogo inig katapos na sa lubong ni Methusael karong hinapos buwan.
Duha ka mga suspetsadong mipusil kang Methusael nga sila si Diosdado Ortega ug Jackie Trazona, mga confidential agent sa Regional Anti-Ilegal Drug Operations Task Force (RAIDSOTG-7) samtang gawasnon ang laing suspetsado nga si Yuli Ramas.
Hinuon napasaka na ang kasong murder ug frustrated murder batok sa mga akusado, lakip sa gipasakaan og illegal possession of firearm, obstruction of justice for harboring criminals mao si PO3 Ken Yngayo human usab didto motago ang mga suspetsado sa iyang panimalay ug nakuhaan usab ang police og mga high power firearm nga way lisensya. – BANAT NEWS