CEBU - Gumikan sa dakong gugma, usa ka amahan naghikot og pisi sa liog hangtod namatay human niya giunay og patay ang iyang kaugalingong 5-anyos nga anak ug 10-anyos nga batang German national nga anak sa iyang kapuyo sulod sa usa ka apartelle sa dalan Escario, barangay Camputhaw, ning dakbayan.
Nabangalan sila kagahapon na sa alas 11 sa buntag. Ang naghikog mao si Felix Ortiz, 35, taga Surigao City, dunay live-in partner.
Gipatay ni Felix ang iyang 5-anyos nga anak babaye nga si Christy Mae Tabal, Kinder 1 ug ang half-brother niini nga German national nga si Christoph Von Borstel, 10, usa ka Grade 3 sa usa ka tunghaan dinhi.
Ang kapuyo ni Felix nga si Bernadita Tabal Von Borstel, 38, nga usa na ka biyuda taga Sitio Proper, barangay Guba ning dakbayan maoy nakadiskubre sa patay’ng lawas sa lalaki nga nagbitay sulod sa Room 211 sa The Apartelle.
Si Isabelo Tabal, igsuon ni Bernadita, mitug-an sa Banat News nga sayo unta nilang gikuha ang mga bata sa maong apartelle aron mangompra alang sa paghikay sa adlaw ni Christoph.
Apan sa dihang mituktok sila sa maong lawak, walay nangabli ug sirado na ang kandado hinungdan nga nanawag sila og staff aron ablihan. Sa dihang, naabli na nakit-an nila nga nagbitay na si Felix nga wala nay kinabuhi.
Ang mga sakop sa Homicide Section nakasota nga ang duha ka mga bata gipangbaatan sa ilang mga ulo sa plastic bag nga pang-grocery ug wala na makaginhawa. Ang duha ka bata nakit-an nga nag-ubo sa kama nga wala nay kinabuhi samtang nanglagom na ang kalawasan.
Sa imbestigasyon ni SPO1 Jay Yballe, chief investigators sa Homicide Section nga nahinabi sa Banat News nagkanayon nga ila karong gisugyot ngadto sa pamilya nga ipaubos sa autopsy ang tulo ka mga patay’ng lawas aron masota kun unsay hinungdan sa ilang kamatayon.
Samtang ila usab nga gipa-eksamin ang mineral water nga ilang nakuha didto sa lawak aron pagsota kun wala ba kini mga gipangbutang nga hilo.
Nagtuo si SPO1 Yballe nga posibleng mga alas 11 pasado sa gabii o sa kaadlawon kagahapon nahimo ni Felix ang pagpatay sa duha ka bata ug paghikog gumikan kay migahi na ang mga lawas niini.
Apan giklaro ni SPO1 Yballe nga aduna na silay giya karon labot sa imbestigasyon human usab ang kapuyo ni Felix nga si Bernadita mitug-an kaniya nga aduna sila'y problema nga gihambin, ilabi na sa gugma.Walay nakitang suicide note gikan ni Felix.
Sila si Bernadita mi-check-in sa The Apartelle niadtong Disyembre 31 sa miaging tuig.
Si Isabelo mipasangil kang Felix nga nagumon sa ginadiling drugas.
Matud ni Isabelo nga si Felix gipalitan og yuta ni Bernadita ug gipatukoran og balay sa Surigao.
Sa gabii sa wala pa mahitabo ang insidente, nangaon pa silang Felix, Bernadita ug mga bata sa usa ka restaurant.
Si Bernadita wala matulog sa apartelle ug miuli sa Guba, samtang gibilin ang mga bata gumikan kay gusto usab ni Felix nga magduwaduwa lang sa duha.
Si Dahlia Tabal mitug-an sa mga tigbalita nga duha na ka tuig nagkabulag ang iyang igsoon nga si Bernadita ug si Felix, kini human adunay laing langyaw nga gika-relasyon ni Bernadita human mamatay ang bana niining German national.
Gikatahong nagselos og maayo ang nagpakamatay nga si Felix tungod kay dili kini gustong makigbulag kang Bernadita. (BANAT NEWS)