Mga kurakot, kawatan ug badlungong kawani sa City Hall gihinginlan ni Rama

CEBU - Gihinginlan na ni Cebu City Acting Mayor Michael Rama ang mga kawatan, kurakot, mangilkilay ug ang tanang badlungon nga mga kawani sa City Hall.

Kini atol sa gipahigayong flag raising ceremony sa mga empleyado subay usab sa unang adlaw sa trabaho kagahapong adlawa.

Giangkon sa acting mayor nga iyang gikauwaw ang iyang nadungog nga mga estorya labot sa badlungong mga kawani sa City Hall.

Kini tungod kay giingong dili niya binuhatan ang bisan unsang illegal nga kalihukan may kalabutan sa panerbisyo sa gobiyerno.

“Sige man gud ta og kadungog anang mga estorya ba nga dili ma-release ang permit kung way padangog ingon ana ba,” sumala ni Rama.

Gitataw hinuon sa acting mayor nga siya walay panahon nga mangita sa nahisgutang mga empleyado niining panahuna.

Apan nidugang si Rama nga kini dili usab magmahay kung dunay reklamo nga iyang madawat labot sa dili maayong binuhatan niini.

“Ato dayon nang ipaimbestigar unya kung mapamatud-an nga tinuod ang akusasyon, ang-ang ba og ato nang hatagan og pasidungog,” dugang pamahayag ni Rama.

Gipahinumduman sa acting mayor ang mga kawani nga siya mahimo nang makataktak, makasuspenso ug makapa-balhin og empleyado sa City Hall.

Malaumon si Rama nga motuhop sa alimpatakan sa mga kawani ang iyang pasidaan ug pahimangno ug magbag-o na ang iyang gipadungog nga mga badlungon.

Apan gipadayag sa acting mayor nga siya seryoso sa iyang pasidaan ug dili angayang suwayan sa hingtungdang mga empleyado.   BANAT NEWS)