CEBU – Security guard nga nahinanok sa pagkatulog sulod sa iyang panimalay ang gipusil- patay sa wala mailhing mamumuno kagahapon sa kaadlawon sa barangay Pangdan, Cambanay dakbayan sa Danao.
Ang namatay giila sa kapulisan nga si Armino Lavador Gica, 32, nagpuyo sa nahisgutang lugar tungod sa samad pinusilan diha sa agtang.
Si SPO1 Glenn Manulat sa Danao City Police Office nga nahinabi sa Banat News nga wala pa gihapon mailhi ang mamumuno ug ang motibo sa pagpatay sa biktima.
Matud pa niini nga nakasulod ang suspetsado sa panimalay sa biktima agi sa wala pa matiwas nga bintana hinungdan nga nakasulod kini ug nidiretso’g abli sa pultahan sa kwarto ug gipusil ang biktima nga natulog.
Human sa pagpamusil daling nisibat ang wala mailhing tawo ug wala na gyud kini maabti pa sa mga ni-respondeng polis.
Hinuon si SPO1 Manulat nibutyag nga adunay walo ka mga tawo nga gipaubos karon sa paraffin test nga ning bag-uhay lang pulos nakaaway sa biktima.
Kini dihang gisubay sa mga polis ang tanang mga tawo sa ilang dapit kabahin sa background sa maong gwardiya ug diha nila masayring daghan kining nakontra, ug gani usa ka adlaw una pa mahitabo ang pagpatay duna sad kini gikalalis sa ilang dapit. – BANAT NEWS