CEBU - Namatay pipila ka oras human madangat sa Perpetual Succor Hospital ang tag-iya’g litsonan human gipauwanan og mga bala sa tulo ka mamumuno niadtong Disyembre 31 sa miaging tuig mga alas 10:10 sa gabii diha sa ilang panimalay sa Sitio NGA, Barangay Lahug ning dakbayan.
Ang namatay giila sa kapolisan nga si Methusael Inesola, 39, residente sa nahisgutang lugar human nakaangkon og samad pinusilan sa nagkadaiyang parte sa iyang kalawasan. Naangol usab ang trabahante niini nga si Lerio Abadiez, 41, taga Pardo human maigo sa duha ka mga paa.
Samtang ang mga suspetsado giila sa kapolisan nga sila si Yuli Ramas, taga Pardo kinsa nakasibat human sa hitabo, apan nadakpan ang mga kauban niining sila si Diosdado Ortega, 30, taga Sitio Fatima barangay Basak, Pardo, agent sa Regional Anti-Illegal Drugs Special Operations Task Group (RAIDSOTG-7) ug Jackie Trazona, taga Tagonol, Cogon sakop usab sa RAIDSOTG-7.
Sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office, si Inesola gikatahong nag-atiman sa tindahan niining letson diha gawas sa ilang panimalay uban sa iyang mga trabahante ug mga kabanay.
Kalit lang mibutho ang tulo ka suspetsadong sila si Ramas, Ortega ug Trazona nga nagsakay sa motorsiklong kolor itom ug puwa nga Yamaha nagtangag sa plakang IY 5522. Gikatahong mihunong daplin sa dalan ang motorsiklong gisakyan niini ug diha-diha si Ramas nanaog dayong pusil makadaghang higayon ngadto sa biktimang si Inesola, hinungdan nga naapil sa pagkaigo ang trabahante niining si Abadiez.
Apan bisan pa man kun ang biktimang si Inesola nalup-og na sa daplin sa dalan ang duha ka mga suspetsadong sila si Ortega ug Trazona mitiwas usab sa pagpusil sa biktima.
Ang saksi nga si Rogelio Adolfo kinsa bayaw sa gipatay mitug-an sa kapolisan nga iyang nasundan si Ramas nga nisibat nga naglakaw paingon sa Ayala access road ngadto na sa dalan J. Juana diin didto na nahanaw.
Samtang ang laing mga saksi nga mga trabahanteng manglitsonay ug pag-umangkon sa gipatay nga sila si Rodney Adolfo, 18, Jeffrey Veronas, 19, Oliver Veronas, 22, ug Ryan Lopez, 26, nakakita sa laing duha ka mga suspetsado nga si Ortega ug Trazona nga misulod sa panimalay ni PO3 Ken Gerson Yngayo sakop sa Regional Logistics Division sa PRO-7 human usab gibiyaan sa mga suspetsado ang motorsiklo niini didto sa crime scene.
Ang mga sakop sa Emergency Rescue Unit Foundation daling midala sa mga biktima sa Perpetual Succor Hospital apan si Inesola nakabsan sa kinabuhi pipila ka oras ang nakalabay.
Hinuon ang duha ka suspetsado nga si Ortega ug Trazona ang nadakpan sa mga sakop sa Special Weapon and Tactics (SWAT) ug mga sakop sa Mabolo Police Station human mitago sa panimalay ni PO3 Yngayo.
Miresulta usab sa pagkonpiskar gikan sa posesyon ni Ortega ang usa ka .45 nga pistola, usa ka magazine niini, usa ka comuoflage holster, unom ka bala sa .45, pitaka nga adunay P200, ID sa RAIDSOTG-7 isip agent nga nagdala sa pangalan niini ug laing ID sa CIIB.
Samtang nakuha usab sa posesyon ni Trazona ang usa ka Frontier revolver, lima ka bala, lisensya, ug ang ID niini sa RAIDSOTG-7 isip agent.
Apan ang mga sakop sa SWAT ug Mabolo Police Station misikop kang PO3 Yngayo, human usab sa pag-search sa panimalay niini nga nakuhaan og usa ka KG9 machine pistol, usa ka silencer niini, duha ka magazine, usa ka 99mm Taurus pistol uban sa 14 ka bala sa 99mm ug lain pang unom ka mga bala sa 99mm.
Si Sr. Inspector Mario Monilar, hepe sa Homicide Section sa CCPO mibutyag nga kasong murder ang ilang ipasaka batok sa mga suspetsado karong Lunes.
Samtang kasong obstruction of justice/harboring of criminal ug kalapasan sa RA 8294 illegal possession of firearm ang ipasaka batok ni PO3 Yngayo.
Si Monilar mipadayag nga ang bangi sa negosyo maoy usa sa anggolo nga ilang gilantaw sa maong krimen ug gani niadtong 2007 Disyembre 31, alas 9 sa gabii gipusil patay usab ang bana diha sa ilang lugar samtang nagbantay sa iyang litsonan.
Si PO3 Yngayo nga gikahinabi sa mga tigbalita hugtanong mihimakak sa kalambigitan sa maong krimen ug mihimakak nga kaila niya ang duha ka mga suspetsado nga didto nasikop sulod sa iyang panimalay.
Gani siya mismo ang mipindot sa mga sakop sa SWAT nga ang duha ka suspetsado didto mitago sa iyang panimalay human sa krimen.
Samtang si PRO-7 Chief Ronald Roderos mipahibalo nga iya nang gimanduan ang iyang staff nga si Supt. Vicente Loot sa paghatag og abogado kang PO3 Yngayo.
Apan giklaro niini nga wala magpasabot nga makalingkawas na si PO3 Yngayo sa kasong administratiba nga ilang ipasaka batok niini ug sa pagkakaron ila pang gipaabot ang report gikan sa CCPO labot sa insidente. (BANAT NEWS)