Motor misampak sa taxi, 1 patay

CEBU - Patay ang usa ka 26-anyos nga lalaki human magsungag ang gisakyang motorsiklo ngadto sa kasugat nga taxi kagahapon sa kaadlawon diha sa south reclamation road habig sa barangay San Isidro, dakbayan sa Talisay.

Ang namatay giila ni PO3 Amelito Hornales sa traffic division nga si Ramesis Bacho, taga barangay Tubod lungsod sa Minglanilla tungod sa naangkong grabeng kadaot sa lawas.

Ang nakadasmag kaniya nga drayber sa taxi nga si Ramon Cabagti, 32, lumad nga taga barangay Panugnawan, lungsod sa Medellin maoy mihatud kaniya ngadto sa Cebu City Medical Center (CCMC).

Si SPO4 Henry Obiso, hepe sa traffic division sa dakbayan sa Talisay sa pakighinabi niini sa Banat News kagahapon mibutyag nga alas 12:10 kagahapon sa kaadlawon nahitabo ang panagbangga.

Alas 4:00 sa kaadlawon samang adlaw gipahibawo siya ni Hornales nga si Bacho nakabsan na sa iyang kinabuhi diha sa nahisgutang tambalanan.

Si Bacho nagmaneho sa Honda XRM nga motorsiklo nga nagtangag sa plakang 9481-GB gikan sa habagatan nga bahin paingon ngadto sa dakbayan samtang si Cabagti gikan sa Tabunok paingon ngadto sa barangay Dumlog.

Dihang “go” na ang signal sa traffic light sa habig paingon ngadto sa Dumlog mipadagan si Cabagti sa gimaneho niining taxi apan si Bacho kinsa giingong kusog kaayong nagpadagan sa iyang motor wala na makakontrolar sa paghunong pagsiga sa “stop” signal hinungdan nga mideretso kini sa pagbangga sa tuong bahin sa taxi.

Matud ni Obiso nga maayong pagkalabay ni Bacho diha sa karsada ug dali kining gipunit ni Cabagti ug gidala ngadto sa nahisgutang tambalanan.

Si Cabagti ang temporaryo karong gibalhog sa karsel sa Talisay City Police station alang sa pagpasaka og kaso. (Brenda Batuto)   (BANAT NEWS)