Fetus sa garapon gibilin sa simbahan

Usa ka fetus nga gisulod og garapon nga plastik ang gibiyaan diha sa kilid sa simbahan sa Santa Teresa de Avila sa Talisay niadtong Lunes sa hapon.

Si Senior Inspector Jovito Canlapan sa Talisay City Police Station mibutyag sa Banat News nga nakadawat sila og tawag kabahin sa maong fetus.

Base sa imbestigasyon sa kapolisan nga ang namintal   diha sa simbahan ang nakabangal sa maong fetus nga gibana-banang lima ngadto sa unom ka buwan ang pangidaron.

Ang nahisgutang fetus nga wala matino kung babaye ba o lalaki gibendisyonan ni Sister Ma. Judith Geslaga dayon gidala sa mga polis ngadto sa sam-ang sa barangay Poblacion ug gilubong.

Si Canlapan nagkananayon nga gituohang bag-o pang migawas gikan sa sabakan sa inahan ang maong fetus tungod kay lab-as pa kini.

Ang mga tawo diha sa simbahan ilabi na ang pintor nga nakakaplag niini wala makabantay kung kinsay nagbutang sa maong garapon kilid sa simbahan.